Bir katre içen çeşme-i pür-hûn-ı fenâdan
Bâşın alamaz bir dahi bârân-ı belâdan

Âsûde olam dersen eger gelme cihâne
Meydâne düşen kurtulamaz seng-i kazâdan

Sâbit-kadem ol merkez-i me'mûn-ı rızâda
Vâreste olup dâire-i havf u recâdan

Dursun kef-i hükmünde terâzû-yı adâlet
Havfın var ise mahkeme-i rûz-ı cezâdan

Her kim ki arar bûy-ı vefâ tab'-ı beşerde
Benzer ana kim devlet umar zıll-ı hümâdan

Bî-baht olanın bağına bir katresi düşmez
Bârân yerine dürr ü güher yağsa semâdan

Erbâb-ı kemâli çekemez nâkıs olanlar
Rencîde olur dîde-i huffâş ziyâdan

Her âkile bir derd bu âlemde mukarrer
Râhat yaşamış var mı gürûh-ı ukalâdan

Hâlletmediler bu lügâzın sırrını kimse
Bin kâfile geçdi hükemâdan fuzalâdan

Kıl san'at-ı Üstâd’ı tahayürle temâşâ
Dem urma eger ârif isen çûn ü çerâdan

İdrâk-i me’âli bu küçük akla gerekmez
Zîrâ bu terâzû o kadar sıkleti çekmez



Şairin Adı : » Ziya Paşa
Şiirin Ölçüsü : Aruz
Şiir Türü : Terkib-i bent
Kitabın Adı : » Eş'ar-ı Ziya